Illudan go oainnán ovtta nubbi priváhta ja kommersiealla fitnodaga oidnet ahte sámegiella lea gollegiella. Ahte dinešedje dainna go fállet gálvvuideaset ja fálaldagaideaset maiddai sámegillii. Diibmá beaggái ahte mobiltelefuvnna fáladeaddji Chess lea ásahan geavaheaddjibálvalusa sámegillii. Odne oaidnit áviissas Aftenposten ahte Tandberg fállá válljenvejolašvuođalisttu sámegillii ođđa TVas mii boahtá márkanii borgemánus. Ovdal leat maid sihke Microsoft ja Apple bargan ásahit sámegielat čovdosiid elektruvnnalaš čovdosiidda.
NSR/SáB Sámediggeáirras Klemet Erland Hætta lea dán giđa čujuhan stáhta ásahusaide mat rihkkot giellalága go eai fála sámegielat čovdosiid elektruvnnalaš fálaldagaide nugo iešdieđáhusas. Vástádus mii bođii Vearrodirektoráhtas logai ahte sii geavahit “Oppgaveregisteret” mii Brønnøysundregister hálddaša ja dat ii doarjju sáme fonttaid.
Go Microsoft, Apple, Chess ja Tandberg máhttet - manne bei Stáhta ásahusat, geat vel lága bokte leat geatnegahtton, eai máhte?
